Velkomin(n) !
RGLUG er GNU/Linux notendahópur fyrir stærsta byggðarlag Íslands, Reykjavík og Nágrenni! Linux users group (LUG) er staðarbundinn stuðningshópur, samfélag og vettvangur gnu/linux notenda. LUGs eru eru þekkt vítt um allan heim og mætti líkja þeim við svæðisskrifstofur gnu/linux. Þar geta núverandi sem og tilvonandi gnu/linux notendur stundað skoðanaskipti og hjálpað hvor öðrum. RGLUG er okkar tilraun til að heimfæra þessa hugmynd.
Markmið og stefna
Markmið okkar með stofnun RGLUG er ekki aðeins að skapa notendum GNU/Linux vettvang þar sem þeir geta rætt saman og skipst á upplýsingum, heldur einnig sá að upplýsa fólk almennt um frjálsan hugbúnað og þá hugmyndafræði sem býr honum að baki. RGLUG á ekki síður erindi við tilvonandi GNU/Linux notendur en núverandi. Meðal þess sem við höfum á stefnuskrá okkar er:
- Að kynna kosti GNU/Linux fram yfir önnur stýrikerfi.
- Að kynna þá hugmyndafræði sem liggur til grundvallar frjálsum hugbúnaði.
- Að styðja við bakið á þeim sem nota GNU/Linux og frjálsan hugbúnað.
- Að eyða fordómum og algengum ranghugmyndum um GNU/Linux og frjálsan hugbúnað meðal almennings.
- Að mynda kjarna íslenskra áhugamanna um frjálsan hugbúnað sem gæti unnið að þessum stefnumálum.
Saga
RGLUG var stofnað í Júní 2003 af nokkrum tölvuáhugamönnum sem töldu að hér á landi vantaði einhvern vettvang fyrir notendur GNU/Linux og frjáls hugbúnaðar. RGLUG er ætlað að vera sá vettvangur.
Starfsemi
Við höldum reglulega fundi sem öllum er velkomið að sækja. Þar geta gnu/linux notendur hist og rætt málin. Einnig geta áhugasamir fengið aðstoð frá reyndari gnu/linux notendum með uppsetningu og önnur mál. Póstlistinn er hjarta hvers LUG og fara flestar umræður fram þar. Öllum er frjálst að skrá sig og senda á póstlistann.